السبت، ديسمبر 22، 2012

دستور ديجول!!


كنت قد فرضت على «المفاعيص» أولادى حظر التجوال فى المنزل أثناء مشاهدة عملية الاستفتاء على الدستور عبر القنوات الفضائية، ومتابعة التطورات وما يحدث فى اللجان أولًا بأول.. وفجأة اخترقت «أبو نص لسان» الحظر، كما يخترق الإخوان الصمت الانتخابى، وبادرنى قائلا:

- بابا.. هو حضرتك شاغل نفثك ليه بالدثتور ده؟
- عشان الدستور ده مستقبلى ومستقبلك ومستقبل مصر كلها.. وهو ده اللى كل المصريين مستنيينه.
- مثتنيينه بأمارة إيه..؟
- شوف الناس قد إيه اللى رايحة تدلى بصوتها فى الاستفتاء.
- قثدك الناث اللى رايحة "تثوت"؟!
- تصوت أو تحط صوتها.. المعنى واحد.
- لأ يا حج المعنى مش واحد.. فيه ناث كتير فعلًا رايحة "تثوت" ولو "اللطم" مش حرام كانت "لطمت" كمان على الدثتور ده واللى حثل بثببه.
- سيبك من الكلام بتاع جبهة الإنقاذ ده.. وسيبك من الكلام الكبير اللى بيقولوه الجماعة بتوع ميدان التحرير.. الدستور ده أحسن دستور فى الدنيا.. وهو ده اللى هيخلى مصر تستقر.. والجنيه هيعدى الدولار.. وهنتعالج فى أحسن مستشفى.. وهنلبس أشيك لبس.. وهناكل ألذ أكل..
- حيلك حيلك يا عم الحج.. إيه الأحلام دى كلها.. أومال إذا كان الدثتور ده مفيش عليه توافق وطنى كنت قولت إيه؟!
- على فكرة الناس الكبيرة الواعية اللى بتفهم قالوا مش شرط يحصل توافق على الدستور مية فى المية.. وقالوا إن دستور فرنسا 1946 وافق عليه 53% مع مقاطعة 31%.. يعنى إحنا ممكن نبقى أحسن من فرنسا.
- يا حج الناث دى بتقول الكلام اللى بيخدم النظام الحاكم، عشان يضمنوا لنفثهم ثبوبة، ويحموا مثالحهم ومحدش يقرب لهم..
- قصدك إن دستور فرنسا موافقشى عليه 53%؟!
- لأ يا بابا دى الحقيقة.. وثحيح دثتور فرنثا ثنة 46 وافق عليه 53% مع مقاطعة 31%.. لكن عشان عيوبه وعشان مكنش عليه توافق وطنى دخلت فرنثا فى فترة اضطراب ثياثى 12 ثنة، وانتهت بوضع دثتور جديد تحت قيادة شارل ديجول سنة ١٩٥٨ واتوافق عليه من ٨٢٪ من المشاركين فى الاثتفتاء.
- يا نهار أبيض.. يعنى إحنا هنقعد 12 سنة فى هم وغم ومشاكل وخناقات واعتصامات ومليونيات وبلطجة وقتل لغاية ما ييجى المحروس شارل ديجول ويحطلنا الدستور الجديد..!
- الله يجازيك يا بابا.. شكلك تبع الجماعة اللى قالوا "نعم"..!!

ليست هناك تعليقات:

إرسال تعليق